SKITOUR WILDHORN 06.05.16

Am vieri simer vo Goldiwil us gstartet. Nach der Fahrt id Länk simer di steili Strass gäg d Iffigenalp ufegfahre und vo dert us öpis vor dä Sächse gstartet. Der See isch guet igschneit gsi und so heimer uf diräktem Wäg zur Wildhornhütte chönne ufstige. D Hütte isch scho nüm bewartet, aber es paar Türeler hei im Winterrum übernachdet. Mit dä erste Sunnestrahle im Rügge simer zum Chilchli und übere Gletscher zum Gipfu zoge. Ds schöne Panorama iz Wallis, i Richtig Gstaad und Sanetschpass und gäge d Bärner Höger isch troumhaft gsi.
Uf der Abfahrt heimer obe no Pulver vom letschte Wuchenend gha und mänge schöne Schwung uf der grosse Äbeni vom Gletscher chönne mache. Ab der Hütte isch der Schnee immer sulziger und schwerer worde.
​

Mit derbi: Chrisitan Schneider, Michael Nägeli, Richu Graf und Säm Ryner